ولد...ولد...يارب ولد ..
أسألك ربى أن ترزقني بالولد .
ليبرني وأمه ويكون لي ولها خير سند .
ويزيدني وإياها جلدا على جلد .
وجاءت البشرى بالولد ..
اصحي يابلد .. جاني الولد .. جاني الولد
هيخلد ذكرى ويمد جذري لأبعد أمد .
هيحمل اسمي واسم أبويا وجد جدي للأبد .
هيرعى أرضى ويشوف مصالحي ويكون وتد .
جاني الولد .. جاني الولد .. جاني الولد ..
ولدى ياولد :
أنا اللي بيك اشتد عودي واتمد ضهرى .
أنا اللي بيك رجعتلى روحي رجعت كرامتي .
أنا اللي بيك حسيت كأني ملكت عصري .
أنا اللي بيك قدرت انى أتحدى قهري .
أنا اللي بيك هيدوملى عزى ويزدادلى فخري .
أنا اللي بيك حسيت كأني بقيت شباب رغم سني .
أنا اللي بيك عرفت انى عبد راضى ربى عنى .
عشانك ياولدى رفعت يدى ودعوت ربى .
ولما جيت بررت نفسي وشكرت ربى .
أشكرك ربى...أشكرك ربى ...أشكرك ربى ...
ولدى ياولد
اعلم ياولدى انه مايموت أبو الولد .
أبو الولد بيعيش سنين ملهاش عدد .
أبو الولد بيحس انه ملك زمانه زى الأسد .
ويصبح اسمه في البلد أبو الولد .
اوعك ياولدى تتخلى عن إن يكون لك ولد .
يحمل اسمك واسمي بعدك .
يكون عكازك يكون مرايتك .
يكون رفيقك في طريقك .
يكون صديقك وقت ضيقك .
يكون نجاتك وقت غرقك .
يكون كتفه جنب كتفك .
يشد أزرك ويقوى قلبك .
اوعك ياولدى تتخلى عن إن يكون لك ولد .
واوعك تنسي انى فنيت عمري في انتظارك ياولد ..
ولكن لم يضع الله عمري بدد.......
انا عمرى ماأمنت ان فى فرق بين بنت وولد لانى كان عندى دليل قوى بيؤكدلى فكرتى وهو البيت اللى انا نشأت فيه .. بابا عمره ما فرق بين بنت وولد وحتى لو كان فى تفرقه فبتكون لصالح البنت .. وعشان كده انا بعتبر نفسي محظوظة بعيلتى...
لكن لما كبرت عرفت ان لكل قاعدة شواذ .. والقاعدة هى ان كل الناس بتتمنى الولد وبتعمله الف حساب , والشاذ هو البيت اللى انا نشأت فيه وايمانه بقوله تعالى يهب لمن يشاء اناثا ويهب لمن يشاء ذكور..
اللى خلانى أكتب الموضوع ده هو حدث جميل جدا وسعيد على قلبى وهو ان أختى الكبيرة أم جنه وضعت النهارده مولودها التانى _ محمد _...
مش قادرة اوصفلكم حالة السعادة اللى العيلتين فيها عيلة والد محمد وعيلة والدته اللى هو احنا....
لما اختى ولدت جنه كنا كلنا سعداء جدا بيها ويمكن نكون احتفلنا بيها اكتر من محمد بكتير بس كانت سعادتنا بيها من باب انها اول مولوده لكن سعادة العيلة النهاردة سعادة من نوع تانى .. سعادة الولد
حتى جوز اختى رغم انه كان بيقول انا مش فارقه معايا بنت او ولد .. كل اللى يجيبه ربنا كويس , لقيته طاير من الفرحة ومش مصدق نفسه , كمان حاسه انه بقى بيحب أختى أكتر ....
حتى أنا لقيتنى ماشية مع التيار وبصدق المجتمع وبفكر بنفس تفكيره ونسيت كل اللى بابا علمهولى فى 21 سنه ولقيتنى فرحانه جدا ان المولود ولد ... لانى بنت وفى يوم من الايام هعيش فى بيت من بيوت المجتمع ده واللى مسيطر عليهم التفكير ده , وبالتالى بدأت افكر زى الناس عشان اقدر أتعايش معه وما أكونش صاحبة فكر لوحدى بيعتبره المجتمع تفكير خطأ .....
تفتكروا فى الحالة دى مين الصح ومين الخطا ...
ياترى بابا هو الصح انه ماشى ضد التيار وضد مجتمعنا الذكورى من الدرجة الاولى , ولا المجتمع هو الصح لانه بحفاظه على الولد يعتبر بيحافظ على بقاء نوعه....
بصرف النظر عن اى حاجه,
أحب أقول أهلا بيك يامحمد نورت العيلة ........
إمضاء
طنط بوسي
هناك 31 تعليقًا:
لأ يا بوسى
المجتمه مش ذكورى
ولو هوا كدا يبقى لازم يتغير
مش حكاية بقى البنت زى الولد والكلام دا
لكن المرأة نصف المجتمع
بل هيا المجتمه كله فى بعض الأوقات
هيا الأم والزوجه والبنت الحنونه والأخت الطيبه
هيا كل ذلك واكثر
السلام عليكم
بوست حلو قوى وفكرته جديده
بس بتفق مع بلو ويف
ان المراه ليها دور مهم فى المجتمع
ووراء كل رجل عظيم امراه عظيمه
تحياتى
blue-wave
************
فى البوست ده يادكتور عمرو انا مش بغفل دور المرأة لكن بأكد على دور الرجل ... وان فكرنا مازال متوقف عند حاجه معينه هى الولد اللى بيحمل اسم الاب ....
أشكر مرورك...
وسعيدة جدا انك بقيت زائر دائم للمدونة......
طنط بوسى
فارس بلا جواد
**************
سعيدة جدا بزيارتك .. وانا كمان متفقة معاك .........
بس تفتكر لو فى يوم من الايام _ لا قدر الله _ ماأنجبتش ولد .. هتحس بإيه ؟؟؟
اتمنى انك تكون زائر دائم للمدونة...
طنط بوسي
اكيد باباكى هو الصح
مجتمعنا محتاج ييغير حاجات كتير فيه
بوست حلو اوى
مبروك يا اجمل طنط فى الدنيا
ربنا يخليه لهم يارب ويبارك فيه
ده كفايه انه اسمه محمد واخده بالك انتى؟؟
بس انتى على النت اهو مش فاتحه ميل ليه طمنينى عليكى
اه معلش نسيت اقولك كلامك جميل يا قمر
وانا كنت لك رأيى صوح ولا ايه؟؟
المجتمع فيه حاجات كتير غلط
من ضمنها الفرحة بالولد في مقابل الحزن بالبنت
ده كلام مش في الدين
ومش في المنطق
صحيح ناس كتير كدة لسة بس الظروف اثبتت ان ان لم يكن الاتنين زي بعض فالبنت اضمن في الزمن ده
علي العموم مبروك للولد لانه مولود
وربنا يرزق الجميع يارب بالاتنين
تحياتي
magn0lia
**********
أنا عارفه , لا ده انا متأكده ان بابا هو الصح .. بس للاسف شخص واحد ضد مجتمع ملئ بالاف مؤلفه من الاشخاص ...
ميرسي ليكى ......
طنط بوسي ....
sometimes
************
صدقى يامنوشه انتى الوحيده اللى باركتيلى على محمد , كل الناس انشغلت بالموضوع ونسيت الواد اللى انا عاملة الموضوع أصلا عشانه...
بس ايه يامنوشه الواد شكل جمه تيبيكال..
واخدة بالى ياحاجه .... كنت بقول يارب تتخطبى عشان تعقلى واطمن عليكى .. الخطوبه قلقتنى عليكى اكتر ...
ههههههههههههههههه
طنط بوسي
Kochia
*********
الله يبارك فيكى ....
يارب يرزق كل الناس بالذرية الصالحة.. ويهدى كل زوج ربنا مارزقوش بالولد...
أسعدتينى بزيارتك ........
طنط بوسي
بورك لكِ في الموهوب وشكرتِ الواهب ورزقتِ بره وبلغ أشده
البيت الي انا ربيت فيه..
زيك تمام..بل ويفضل اخوتي الشباب
ان يرزقو بفتيات..
بالطبع بيتنا هو الشاذ بالعائله التي تقدس الولد...
هذا حال العرب جميعا..
قالوا زمان
يا مخلف البنات يا شايل الهم للممات
لا انا طبعا مش مع الفكرة دي
بس برضه مش مع فكرة ان البنت زي الولد خااالص
البنت دايما غير الولد
البنت رقة والولد امان
البنت بسمة البيت الجميلة
حاجة ناعمة حاجة حلوة
البنت عمرها ابدا ما تكون زي الولد
مبروك المولود الجديد
ولد بنت اهم شئ يكون صالح
تعرفي لو واحد معاه مثلا اربع بنات ورباهم كويس هيجيبولوا اربع اولاد
الا هما ازواجهم لما يتزوجوا هيكون هو اب لاربع بنات واربع صبيان صح كدة ؟؟
اولا هو الف الف مبروك على ميلاد محمد
كل اللى يجيبة ربنا جميل وكويس اهم حاجة
العمل الصالح
ربنا ما بينظرش للعبد على اساس عنصرى ذكرى او انثوى ربنا فى النهاية بيحاسبنا على اعمالنا على اننا بشر مش ذكور واناث
احنا اللى تناسينا دا وقلنا ولد وبنت والكلام دا
النهاية ربنا هايحاسبنى ربيت ازاى وعلمت ازاى
تحياتى
محمد فوزى
المجتمع ذكوري كلام صحيح
ليس الاب فقط من يفرح في الولد
بل الام تفرح اكثر منه
مبروك
محمد
اه يا بلد !!!
موضوع جميل اوي بوسي ومثير للفكر فعلا
هو السر في الولد ولا في المجتمع
ويظهر ان مجتمعنا هو اللي غلط
لانه بيعتبر الولد امتداد وحفاظ علي اسم العائلة لاكن الغريب ان المجتمع ما فكرش في اللي شايفة دلوقت بعيونه وماااالي الكون وهو ان البنت الان بتتفوق اكتر وبتشيل المسؤلية اكتر وبتكون اقوي في التصدي للازمات الي جانب دورها الطبيعي من قديم الازل وهي النعومة والانوثة والحفاظ علي البيت والاولاد وبقاء النوع بالحمل والولادة
في رأيي المجتمع هو اللي غلط مش والدك اللي ماشي ضد التيار والدك وابائنا كلنا ربونا صح لانهم فكروا صح وشافو المجتمع الحالي صح
انما المجتمع لسة غلط ماشي بتفكيره القديم واللي كنت اتمني من كل قلبي انه يكون صحيح لاكن ده كان في عصور الولد فيها فعلا سند زي عصر الرسول عليه الصلاة والسلام واظن حرب 6 اكتوبر كان فعلا الولد له هيييييبة انما الان زيه زي غيرة وان لم يكن اقل
والدليل زي ما قلت المسؤلية في كافة الاتجاهات ده طبعا مع وجود بعض الذكور الذين لا تطبق عليهم تلك النظرة ولاكنهم قليييييييييييل
تحياتي لك والف الف الف الف مبروك علي محمد
ويارب ربنا يبارك فيه ويكون من ضمن القليييل الذي لا يتبع القاعدة
طنط بوسى
ليكى تاج عندى
ياريت تنورينى وتاخديه
ايه دا اول زيارة ليا والاقي مولود جديد كمان
ايه الحظ دا
اولا احب اهنيك علي القصيدة اللي كتبتيها فعلا بجد رائعة وكل المعاني جسدتيها بطريقة جميلة اوي
واحب اقول لكي ولاختك مبروك
اما موضوع المجتمع الذكوري انا برضو شايفة ان الفكرة دي لسة سايدة في مجتمعنا وان البنت مش دايما زي الولد
ومع ذلك تفكير والدك صح ومقدرش اقول انه غلط لكن لسة مجتمعنا متقبلش الفكرة دي
وعموما مبرووووووووووووووك
دعوة للخير
http://kouskoza7.blogspot.com/2008/09/blog-post_05.html
m.k
*******
الحمد لله ان لسه فى ناس فى الدنيا كده بس انا بردو مازلت عند رأيي ان دول شواذ القاعدة .......
وكل اللى فى ايدينا ان نسأل الله التغيير فى عقول البشر .......
سعدت بتعليقك .......
طنط بوسي
شملولى ابن سحلولى
*****************
أنا كمان بتفق معاك ياأستاذ شملولى ..
انا عمرى ماأمنت ان البنت زى الولد .. لكن عمرى كمان ماعرفت ان فى بينهم تفرقه.. تفرقة ان الولد احسن من البنت ..
ده انا حتى كنت لسه بدى محاضرة النهارده لبنت فى ان البنت لازم تكون اقل من الرجل . او تحديدا الزوجه لازم تكون اضعف من زوجها..
الولد امان
اعتقد ان حضرتك لخصت القصة بالكلمة دى
يارب دايما منورنى...
طنط بوسي
كراكيب عادل
************
الله يبارك فيك وعقبالك يارب ....
عندك حق ياعادل .. فعلا اهم حاجة الولد الصالح مش الولد وخلاص ...
بس انا ليا رأى ان اللى ع البر شاطر ..
يعنى انت بتقول كده عشان لسه ع البر ولسه مادخلتش فى القصة دى قصة الولد والبنت .. ولسه ماتقدرش تتنبأ موقفك هيكون ايه فى حاجه زى كده ...
مبسوطة جدا انك نورتنى ويارب ماتكنش اخر مرة ........
طنط بوسي
انا من اهوى ومن اهوى انا
****************************
عارف .. والله ده المبدأ اللى بابا ماشى عليه عشان كده بياعى ربنا فينا أوى .. وأتمنى يارب ان ده يكون مبدأ كل الناس فى الحياة..
نورت مدونتى المتواضعة .....
طنط بوسي
الحكمة ضالة المؤمن
*******************
كلامك صحيح بدليل ان ماما هى اللى عاملة اهتمام لأخويا اكتر بكتير من بابا ...
ودليل تانى ان اختى كانت فرحتها بالولد اكتر من فرحة زوجها بيه ..
والزوجه عموما بتفرح بالولد لانها بتبقى شايفه انها بكده حققت امنية زوجها ......
أشكر مرورك ويارب دايما تسعدنى بزيارتك ........
طنط بوسي
walaa gobashy
*****************
صورى ياولاء ان مجتمعنا بقى كله كده .. الولد مش قادر يحقق انجاز زى اللى بتحققه البنت حتى فى التعليم وده شفته فى عائلات كتير جدا...
زمش بس داخل العيلة الوحده ده كمان فى الفصول.. انا كانت مدرستى الثانويه مدرسه مشتركه وكانت البنات متفوقه جدا على البنات ......
المجتمع فيه حاجات كتير اوى غلط مش بس تمييزه بين البنت والولد .. لكن هنعمل ايه هو ده مجتمعنا وهى دى حياتنا اللى مجبورين نعيشها وغصب عننا لازم نرضى ........
بجد اسعدنى تعليقك واسعدنى وجودك ..
طنط بوسي
sometimes
*************
من عينتينى التنتين ياحبيبة قلبى ...
اما اجهز بس هقول ايه فى الورطة دى..
ميرسي يامنوشة ......
طنط بوسي
shirry
**********
زى مابيقولو الخير على قدوم الواردين..
الله يبارك فيك ياحبيبتى ويارب عقبالك..
ميرسي جدا ع الاطراء الجميل ده .......
أنا رأيى مجتمعنا محتاج تغيير جذرى ...
يارب تسعدينى دايما بتعليقك .....
طنط بوسي
قلب مصرى
**********
اهلا بيك نورت المدونه ...
طنط بوسي
أولا حمدالله على سلامة أم جنه
وأهلا وسهلا بمحمد في دنيانا
وعلى سطح كوكبنا الأرض
وثانيا يا بوسي في كتييير جدا
مش بيفكروا التفكير الذكوري ده
لأنه يعلم يقينا أنه لربما يكون الولد طامة على أبويه وربما يكون زوج البنت أحن من الإبن
وقد قال النبي الكريم عليه الصلاة والسلام(من يمن المرأة على زوجها أن تبكر له بأنثى)
والبنت دايما حبيبة أبوها
وهناك الكثير من الآباء يهبهم الله الذكور والإناث فيفضل بنته في معاملته
ليس معنى ذلك إهانة الولد ولكن لعلمهم
أن البنت تحتاج للرعايه والحنان أكثر من الولد
وصحيح أن الولد يمنح أبيه الإمتداد
ولإسمه البقاء فذلك يكون سبب الفرحه بمقدمه
وجميله جدا كلمات الزجل في بداية
حديثك
هذه أول زياراتي هنا ولكن بإذن الله لن تكون الأخيره
تقبلي خالص تحياتي
كل سنة وانتى طيبة
الف مبروك لقدوم المولود السعيد
بوست هايل بس انا شايف دلوقتى ان فعلا البنت بقت زى الولد ف حاجات كتير قوى
بس انا معاكى ان برضة لسة فية ناس متمسكة بالولد
مبروك تانى مرة
إرسال تعليق