رمضان ....... وأنا

كل المدونات اللى دخلتها فى الكام يوم اللى قبل رمضان وامبارح والنهارده بتتكلم عن رمضان
وعن ذكريات اصحابها مع رمضان اللى بيتكلم عن الخروج وزيارة الاهل والاحباب واللى بيتكلم عن طقوس رمضان واللى شايف ان ده شهر اللمه واللى واللى واللى ...............الا انا

انا الوحيدة اللى ماعنديش اى ذكريات مع رمضان ولا حتى طقوس معينه فى رمضان......
حقيقي انا حاسه انى زعلانه جدا ان مش قادرة اشوف الدنيا زى ماالناس شايفاها ولا اعيشها زى ماالناس عايشاها........
ده انا حتى مش عارفه ايه اللى مانعنى انى اعيش الحياة بطريقة الناس.........
فى رمضان كل الناس بتخرج الا انا الوحيدة اللى قاعدة فى البيت اقصى حاجه بعملها انى بروح اصلى التراويح.
فى رمضان كل الناس سعيدة وفرحانه عشان الشهر ده بيبقى مختلف بالنسبه ليهم لكن للاسف الشهر ده عندى زى باقى الشهور...........

وعشان افرح نفسي واحسس نفسي انى فى رمضان عاملة نغمة موبايلى اهو جه ياولاد.............

بسأل نفسي انا ليه حاسة بالغربة فى شهر جميل زى ده مش لاقية اجابة......
ودايما بصبر نفسي ببكرة واقول بكرة اكيد احسن ورمضان الجاى هكون اسعد لكن بكرة بيخذلنى ورمضان الجاى مش راضى يطمنى.....

لكن اللى محسسنى فعلا ببعض الاختلاف عن كل سنه هو المدونه دى...
حاسه انكم اهلى رغم ان تواصلنا مع بعض مجرد تواصل كتابى ... حاسه انكم بتكونوا معايا فى كل لحظة رغم انكم بعيد جدا عنى ... حاسة انى اعرفكم وتعرفونى رغم ان عمرنا ماشفنا بعض والله أعلم ممكن يجى اليوم اللى أشوفكم فيه ولا لا

وفى النهاية كل اللى اقدر اقوله يارب بكرة يكون أحسن.........

Pusssssy