أسفه

انا اسفه جدا انى اتأخرت عليكم . لكن سامحونى والله غصب عنى . لانى بجد اليومين دول بين شقى الرحى - أعتقد ده اكتر تعبير ممكن يوصف حالتى -واعتقد السبب بقى واضح ليكم . ايوه هو كده بالظبط .الامتحانات الله يسامحها . مش قادرة اقولكم اد ايه احنا مطحونين مابين امتحانات اعمال السنه وبين المحاضرات اللى لسه شغاله . ايوه اعمال السنه اصلهم بيعاملونا كأننا أطفال فى ابتدائى واعدادى . ده انا حتى فى ابتدائى واعدادى ماكانش عندى اعمال سنه .لكن يلا بقى أهى سنه وتفوت ولا حد يموت................................................. بجد ادعولى لانى فعلا محتاجه دعواتكم .
أد ايه نفسي ارجع اقرأ مواضيعكم تانى و أحط تعليقات عليها . لكن هانت فات الكتير.
ولكم تحياتى الى أن ألقاكم.......................................
Pusssssy

ومن الحب ماقتل

مش عارفه ليه أنا بقى عندي تصور إن مفيش قصة حب في الأيام اللي إحنا عايشينها دى بتنتهى نهاية سعيدة , كل النهايات بقت بتاخد شكل واحد هو الفراق والمشكلة إن بقت دى حاجه عادية بالنسبة لكل الناس , حتى أبطال قصة الحب نفسهم- بعد النهاية الطبيعية لقصتهم اللي هي الفراق- بيقولوا إحنا يعنى خسرنا إيه أدينا اتسلينا شويه!!!!!!!!!!!!!!!!!!!!!!!!!!!!!!!!!!!!!
بصراحة الحاجات اللي أنا بشوفها دى عملت عندي إحباط , وخلتني اتخذت طريق بعيد تمام البعد عن شخصيتي وهو القسوة والخشونة والصدود , مع إن طبيعتي غير كده خالص .
المهم انى فجأة كده لقتنى بفتح صفحة جوجل وبكتب عليها قصص حب ناجحة . لقيت أدامى القصة اللي أنا جبتها ليكم النهاردة دى , بصراحه أثرت فيا جدا ,يارب تعجبكم بس ياريت بعد ماتقرؤها تقولولى رأيكم وتقولولى كمان هو إيه اللي اتغير في امبارح عن النهارده وخلانا كمان نتغير معاه بكل أخلاقنا وقيمنا ومبادئنا مش بس كده ده كمان بكل أحاسيسنا ومشاعرنا.

كان بالكوفة فتىً جميل الوجه شديد التعبد والاجتهاد فنزل في جوار قوم من النخع, فنظر إلى جارية منهن جميلة فهويها وهام بها عقله,ونزل بالجارية ما نزل به فأرسل يخطبها من أبيها ,فأخبره أبوها أنها مسماة لابن عم لها ,فلما اشتد عليهما ما يقاسيانه من ألم وهوى أرسلت إليه الجارية ,

تقول له : قد بلغني شدة محبتك لي وقد اشتد بلائي بـك , فإن شئت زرتك, وإن شئت سَّهلت لك أن تأتيني إلى منزلي.

فقال للرسول : ولا واحدة من هاتين الخَلَّتين : "إني أخاف إن عصيت ربي عذاب يوم عظيم" (الأنعام:15).

أخاف نارًا لا يخبو سعيرها ,ولا يخمد لهيبها .فلما بلغها الرسول قوله ,

قالت : وأراه مع هذا يخاف الله ؟ والله ما أحد أحق بهذا من أحدٍ ,وإن العباد فيه لمشتركون , ثم انخلعت من الدنيا وألقت علائقها (ما تعلق بها من مال وزوج وولد) خلف ظهرها وجعلت تتعبد,وهي مع ذلك تذوب وتنحل حبًا للفتى وشوقًا إليه حتى ماتت من ذلك.

فكان الفتى يأتي قبرها فيبكي عنده ويدعو لها , فغلبته عينه ذات يوم على قبرها فرآها في منامه في أحسن منظر.
فقال : كيف أنت وما لقيت بعدي؟

قالت : نعم المحبة يا سؤلي محبتكم ...حب يقود إلى خير وإحسان.

فقال : على ذلك إلى مَ صرت؟
فقالت :إلى نعيمٍ وعيشٍ لا زوال له ... في جنة الخلد ملك ليس بالفاني.

فقال لها : اذكريني هناك فإني لست أنساكِ ,
فقالت :ولا أنا والله أنساك, و لقد سألت مولاي ومولاك أن يجمع بيننا فأعنِّي على ذلك بالاجتهاد ,
فقال لها : متى أراك؟

فقالت :ستأتيننا عن قريب فترانا .

فلم يعش الفتى بعد الرؤيا إلا سبع ليال حتى مات رحمه الله.................

بجد يااااااااابختهم ,صدقوا الله فصدقهم الله.................................

كونى له أمه يكن لكى عبداً

زمان كانت الأمهات بتقول لبناتها اللى على وشك الجواز كدة:

أي بنية ,
إن الوصية لو تركت لفضل أدب تركت لذلك منك ,ولكنها تذكرة للغافل , ومعونة للعاقل .
ولو أن امرأة استغنت عن الزواج لغنى أبويها , وشدة حاجتهما إليها ,لكنت أغنى الناس عنه ,

ولكن النساء للرجال خلقن , ولهن خلق الرجال .
أي بنية , إنك فارقت الجو الذي فيه خرجت , وخلفت العش الذي فيه درجت , إلى وكرٍ لم تعرفيه , وقرينٍ لم تألفيه ,فأصبح بملكه عليك رقيباً ومليكاً , فكوني له أمةً, يكن لك عبداً وشيكاً ,واحفظي له خصالاً عشراً,يكن لك ذخراً

.أما الأولى والثانية:
فالخشوع له بالقناعة , والسمع له والطاعة.

وأما الثالثة والرابعة
فالتفقد لمواضع عينه وانفه , فلا تقع عينه منك على قبيح ولا يشم منك إلا أطيب ريح.

أما الخامسة والسادسة:
فالتفقد لوقت منامه وطعامه , فإن تواتر الجوع ملهبة ,وتنغيص النوم مغضبة.

وأما السابعة والثامنة:
فالاحتراس بماله , والارعاء على حشمه وعياله , وملاك الأمر في المال حسن التقدير , وفي العيال حسن التدبير.

وأما التاسعة والعاشرة:
فلا تعصي له أمرا , ولا تفشي له سراً فإنك إن خالفت أمره أوغرت صدره , وإن أفشيت سره لم تأمني غدره .

ثم إياك والفرح بين يديه إن كان مهتماً , والكآبة بين يديه إن كان فرحاً.
فإن الخَصلة الأولى من التقصير. والثانية من التكدير. وكوني أشدَّ ما تكونين له إعظاماً. يكن أشدَّ ما يكون لكِ إكراماً. وأشدَّ ما تكونين له موافقة. يكن أطول ما تكونين له مرافَقةً. واعلمي أنك لا تَصلين إلى ما تحبّين. حتى تُؤْثري رضاه على رضاك، وهَواهُ على هواكِ، فيما أحببتِ وكرهتِ .

لكن فى الايام الغريبه اللى احنا عايشينها دى الأمهات بتقول كدة:

حطى يابت النصايح دى حلقة فى ودنك :

1- جوزك على ماتعوديه وابنك على ماتربيه.(يعنى عوديه على طبعك من أول يوم , واوعى تخليه يسلب شخصيتك ويعودك هو على طبعه).

2-اغلبيه بالعيال يغلبك بالمال.(يعنى بمعنى اصح اخربى بيته).

3-حلقى على طيرك قبل مايلوف على غيرك.(يعنى حطى عينك عليه وراقبيه).

4-يامأمنه للرجال يامأمنه للمايه فى الغربال.(يعنى اوعى تصدقيه مهما قالك بحبك).

5-أقرب طريق لقلب الراجل معدته.(يعنى لو عايزاه يحبك امليله بطنه لحد مايجيله تخمه).

6-اللى جوزها يقولها ياعورة الناس تلعب بيها الكورة.(يعنى اوعى تسكتى له لو هزأك أدام حد).

وعجبى!!!!!!!!!!!!!!!!!!!!!!!!!!!!!!!!!!!!!!!!!

Pusssssy

أخر خطوط الموضة: العروسة جامعية والعريس مدبلم

انا كنت كلمتكم قبل كده عن اول موضوع كتبته فى حياتى وانى بعته للدستور لكن ماتنشرش لان الصفحه اتلغت . وانا قررت النهارده انى انشره عندكم فى مدونتكم Miss Pusssssy انا حطيته زى ماكتبته بالظبط ماحذفتش اى حاجه ولا حتى زودت حاجه.
لو سمحتم اللي في ايده حاجه يسيبها وتعالوا كلكم عشان عاوزاكم في حاجه مهمة بس ياريت بعد ماتعرفوا الحكاية تردوا عليا وتقولولى هو أنا عاقله ولا هبله ولا قربت اتهبل .
بصراحة هي حاجه تجنن برده لما تبقى بنت فقعت نفسها في الثانوية العامة ومن الدرس ده للدرس ده وسهر طول الليل وجايز امتحانات الثانوية العامة تنصفها وجايز لا وبعد ماتخلص الثانوية _ ده طبعا بعد ماتكون هي خلصت وانتهت _ تدخل في مرحلة الكلية بكل أضواءها وابهاراتها تيجى فى الأخر وتتجوز واحد معاه دبلوم
كل مااقابل واحده من صاحباتي ألاقيها لابسة دبلة وزى كل الناس بقولها بجد ألف مبروك وبفضول كل الناس بسألها العريس معاه إيه _ يعنى خريج إيه _ ترد أميرة بصى هو معاه دبلوم بس بيسافر وترد زوزو يابنتى مش هتفرق كتير هو معاه إيه أصل هو من عيله مرتاحة أوى وترد شيماء أصل هو عنده طين (فدادين يعنى) ويقولولى أهو خليكى كده متمسكة بالكلية أما نشوف هتعملك إيه!!!!!!!!!!!!!!!
حد يرد عليا ياناس ازاى أبقى إنسانه جامعيه وفى الأخر أتجوز واحد مش عارف الألف من كوز الدرة وإذا كان بتوع الكليات مابقوش عارفينه يبقى بتاع الدبلوم هو اللي هيعرفه , وشكل الحوار بينا هيبقى ازاى ولا شكلي إيه وأنا بقول إن أنا هبقى مدرسة لكن جوزي حرفى _ مع احترامي طبعا للحرفيين وده مش معناه انى بعيب فيهم _لكن بسأل نفسي ازاى أبقى أنا بتكلم في شكسبير وفاروق جويدة وهو بيتكلم في النجارة أو الحدادة !!!!!!!!!!!!!!!

ويا ترى البنت الجامعية اللي بتتجوز واحد معاه دبلوم دى بتبص لايه فيه؟؟؟؟؟؟؟؟؟ غالبا كلهم بيبصوا للمادة وان هو عنده شقه ويقدر يفتح بيت , لكن أنا عندي حكاية لحد الوقتي مش عارفه هي العروسة دى اتجوزت العريس ده ليه؟؟؟؟؟ هي جامعيه من عيلة كويسه ميسورة إلى حد ما وهو دبلوم ليس له وظيفة ولا عنده شقه ولا حتى اى راتب يبقى دى اتجوزته ليه ؟؟؟؟؟؟؟؟؟؟؟؟؟؟؟؟؟؟؟جايز تكون بتقول لنفسها أهو ضل راجل ولا ضل حيطه !!!!!!!!!!!!!!!لا وعندى حكاية اغرب وادعى للدهشة اعرف بنت في كلية هندسه اتخطبت لشاب معاه دبلوم لمجرد انه هيجيب لها شبكة كويسه وشقه حلوة وبعد كده خطوبتهم فشلت لما سمعت الخبر تصورت إن البنت رجعت لعقلها أو حتى أهلها فاقوا لكن الغريب جدااااااا إن الولد هو اللي فك الخطوبة لمجرد إن خطيبته الأولانيه شاورتله بصباعها وفى ثانيه كان ساب المهندسة وركع أدام خطيبته الأولانيه _ على فكرة هي كانت دبلوم زيه_ يبدو إن الدباليم على أشكالها تقع _ شفتوا العجب !!!!!! أنا مش فاهمه ليه البنات دول بيعملوا في نفسهم كده ؟؟؟؟؟؟؟؟؟؟؟؟؟

عارفين وأنا في بداية الكلية كان عندي رأى تانى خالص في حكاية الدبلوم دى ولما كانت واحدة من صاحباتى تاخد رأيي أقولها والله مش بالكلية ولا بالدبلوم أنا أعرف ناس معاهم دبلوم لكن إحنا منجيش نقطة في بحر علمهم ولا ثقافتهم وبعدين يابنتى في مقاييس تانيه أهم من كده _ ومازلت عند رأيي بعض الشئ _ زى الأخلاق والأدب والدين والعلية المحترمة , لدرجة انى كنت هقع في الخطيئة دى أنا كمان وأتجوز واحد معاه دبلوم لكن الحمد لله الذي عافاني
أنا عارفه إن في ناس كتير أوى هتزعل منى وهتثور لما يقرءوا الموضوع ده لكن حد يقولى هو أنا غلطانة _ أو اى بنت جامعيه _ انى بفكر في إنسان مؤهل زيي وعلى الأقل يبقى في مكان للحوار بينا ؟؟؟؟؟؟؟؟؟؟؟؟؟؟؟؟؟

وأخيرا ليكم ألف سلام من عقل لايهدى ولاينام

pusssssy

بداية الانطلاقه

أولا أحب أعرفكم حكاية المدونة:
الحقيقة أنا عمري ماكان في بالى حكاية إنشاء مدونه دى خالص ولا عمري أصلا كنت من هواة النت لكن الحقيقة إن منى صحبتي مدمنة نت وأخيرا بقت مدمنه مدونات وكانت كل ماتعرف مدونه جديدة تكلمني عنها وده كان في الوقت اللي أنا كتبت فيه موضوع عن العروسة الجامعية اللي بتوافق على عريس معاه دبلوم ,ولانه موضوع شاغلني بشكل غير عادى قررت انى أبعته لجريدة الدستور_ لانى قارئه جيدة للدستور _ ولكن للأسف على مابعتت الموضوع للجريدة كانت الصفحة اللي أنا باعته عليها الموضوع اتلغت , ليه مش عارفه ؟؟؟؟ المهم إن لما منى شافت موضوعي عجبها جدا الموضوع وعجبها أوى اسلوبى في الكتابة وبعديها بفترة كتبت موضوع تانى وكان مضمونه انى نفسي أتجوز دكتور مهما كانت النتائج وبعتت الموضوع ده كمان لجريدة الدستور واتنشر فعلا في صفحة ضربة شمس , ولما منى شافت الموضوع ده كمان قالتلى بجد يابوسي انتى أسلوبك ده محتاج مدونه . والحقيقة انى ماكنتش رافضه المبدأ لكنى كنت شايفه انى عشان اعمل مدونه يبقى لازم التزم بالكتابة والحقيقة انى مش فاضيه خالص في الفترة دى فقلت لها والله الفكرة وارده لكنها سابقه لأوانها شويه.
وبعدين بدأت أنا كمان اقرأ مدونات وأول مدونه قرأتها حازت اعجابى بشكل غير عادى وهى مدونه قضيه عم احمد وكنت هموت وأتعرف عليه أو حتى ابعتله كومنت لكن ماكنتش بعرف أبعت الكومنت وبالصدفة الباحته لقيت ايميله وقررت انى اكلمه وأول حاجه سـألهالى انتى مدونتك اسمها إيه بصراحة اتحرجت خالص لكن قلتله والله أنا ماعنديش مدونه في الوقت الحالي وقفلت معاه وبعد كده نمت.
لما صحيت من النوم كانت دى بداية الانطلاقة ولقيت نفسي من غير مااقصد بعمل مدونه . بصراحة أنا كنت حابه انى اعملها يوم عيد ميلادي 1/1 لكن ده كان هيخلينى استني لحد السنة الجايه لكن قلت مش مشكله لان 19/3 ده يوم مهم برده لأنه يوم عيد ميلاد حد مهم أوى في حياتي وهى اختى الكبيرة أم مازن . كل سنه وانتى أسعد أم مازن فى الدنيا.
بس دى كل الحكاية.
ويارب فعلا أكون ضيفه خفيفة عليكم.

Pusssssy

بناء على طلب الجماهير

بسم الله الرحمن الرحيم


عادة في المواقف اللي زى دى الناس بتقول كده:
السلام عليكم أنا بوسي ودى المدونة بتاعتى Miss Pusssssy أتمنى إنكم تزوروها ويارب تحوز إعجابكم ويارب أكون ضيفه خفيفة عليكم.
لكن في الموقف ده أنا بقول كده:
سيداتي انساتى سادتي نحيطكم علما انه بناء على طلب الجماهير _ منى صحبتي يعنى _ قررت الانسه بوسي , حطوا مية خط تحت الانسه دى ,إطلاق مدونتها الالكترونية Miss Pusssssy وذلك صباح يوم الأربعاء الموافق 2008/3/19 ونظرا لانقطاع التيار الكهربي فقد تم تأجيل الانطلاقة الالكترونية إلى مساء الاربعاء لذلك اليوم ولكم منا كل الفضل والتقدير
والله ولى التوفيق
Pusssssy